प्रजिअवाट जारी आदेश
2078-10-14
2078-10-14
सिन्धुपाल्चोकका प्रमुख जिल्ला अधिकारीबाट मिति २०७८ माघ १४ मा जारी आदेश
विश्वव्यापी महामारीको रुपमा फैलिएको कोभिड-१९ को नयाँ भेरियन्ट ओमिक्रोन सहितको संक्रमण नेपालमा समेत बढ्दै गई सिन्धुपाल्चोक जिल्लामा समेत संक्रमण दर तीब्र रुपमा बढिरहेको हुँदा सोको रोकथाम, नियन्त्रण, निदान र उपचारका लागि नेपाल सरकार (मन्त्रिपरिषद्) का निर्णयहरु, कोभिड-१९ संक्रमण जोखिम नियन्त्रणका लागि स्मार्ट लकडाउन कार्यविधि, २०७८, संक्रामक रोग ऐन, २०२० को दफा २ र स्थानीय प्रशासन ऐन, २०२८ को दफा ६को उपदफा ३ ले दिएको अधिकार प्रयोग गरी यस जिल्लामा मिति २०७८/१०/१५ गते राती १२:०० बजे देखि मिति २०७८/१०/२९ गते राती १२:०० बजेसम्मका लागि लागु हुने गरी देहायको आदेश जारी गरिएको छ ।
- जुलुस, सभा, भेला वा धेरै मानिस भेला हुने क्रियाकलापहरु नगर्ने ।
- सेमिनार समीक्षा वैठक जस्ता क्रियाकलापहरु संचालन गर्दा भर्चुअल माध्यमबाट गर्ने । भौतिक रुपमा उपस्थित भई गर्नु पर्ने भएमा कोभिड-१९ संक्रमण नभएका तथा सो विरुद्धको पूर्ण खोप लागाएका बढीमा २५ जना मात्र सहभागी रहने गरी जनस्वास्थ्यका मापदण्ड पूर्ण रुपमा पालना गरी गराई संचालन गर्ने ।
- डान्स बार, दोहोरी, नाचघर, क्लव, हेल्थ क्लव, जिमखाना, स्विमिङ पुल, फुटसल, पटके हाटबजार र मानिसहरुको भिडभाड हुने अन्य सबै प्रकारका कार्यक्रमहरु संचालन नगर्ने ।
- विश्वविद्यालय, कलेज, ट्युशन सेन्टर, तालिम वा अन्य प्रकारका शैक्षिक क्रियाकलापहरु भौतिक उपस्थितिमा संचालन नगर्ने । त्यस्ता शैक्षिक क्रियाकलाप भर्चुअल वा वैकल्पिक शिक्षण सिकाइका विधिहरु अपनाई गर्ने ।
- कलेजका पूर्वनिर्धारित परीक्षा, जनशक्ति भर्नाका परीक्षा, वैदेशिक रोजगारीका लागि संचलान गरिने विदेशी भाषा परीक्षा तथा चिकित्सा शिक्षाका सबै किसिमका प्रयोगात्मक कक्षा जनस्वास्थ्यका मापदण्ड पालना गरी संचालन गर्ने ।
- मन्दिर, मस्जिद, गुम्बा, चर्च लगायतका धार्मिक स्थलमा जनस्वास्थ्यका मापदण्ड पालना गर्ने गरी नित्य पूजा, ध्यान र प्रार्थना मात्र गर्ने ।
- अनावश्यक रुपमा चिज बस्तु नछुने, दुई व्यक्तिको बीचमा कम्तीमा दुई मिटर दुरी कायम गर्ने, मास्क अनिवार्य गर्ने, पटक-पटक साबुन पानीले हात धुने वा सेनिटाईज गर्ने गरी संचालन गर्ने । जनस्वास्थ्य सम्बन्धी मापदण्ड पालना गर्ने-गराउने दायित्व सम्बन्धित व्यवस्थापक वा संचालकको हुने ।
- ब्रतबन्ध, न्वारान तथा पास्नी जस्ता धार्मिक, साँस्कृतिक, सामाजिक वा अन्य कार्यक्रम संचालन गर्ने गराउने ।
- पर्व, विवाह, न्वारान, पास्नी, ब्रतबन्ध, धार्मिक अनुष्ठान, मृत्यु संस्कार लगायतका अत्यावश्यक परम्परागत धार्मिक तथा सांस्कृतिक क्रियाकलापहरु संचलान गर्दा ५० जना भन्दा बढी नहुने र जनस्वास्थ्यका मापदण्डको पालना हुने गरी मात्र संचालन गर्ने ।
- सार्वजनिक यातायात संचालन सम्बन्धमा संचालकहरुले देहाय बमोजिम गर्नेः-
(क) सिट क्षमता भन्दा बढी यात्रु नराख्ने । (ख) सबै यात्रुलाई मास्क अनिवार्य गर्ने। (ग) सवारी साधनको ढोकामा र सवारी साधनभित्र सेनिटाइजरको व्यवस्था गर्नु पर्ने । (घ) चालक तथा सहचालकले मास्क र फेस-सिल्ड लगाउनु पर्ने । (ङ) सवारी साधनलाई दैनिक रुपमा निसङ्क्रमित गर्नु पर्ने । (च) सार्वजनिक यातायातमा कुनै यात्रुले मास्क नलगाई आएमा चालक वा सहचालकले बढीमा ५ रुपैंया लिई मास्क उपलव्ध गराउनु पर्ने । (छ) मास्क नलगाउने व्यक्तिलाई सवारी साधनमा प्रवेश गर्न नदिने । (ज) लामो दूरीमा चल्ने सार्वजनिक यातायातमा बीच बाटोमा थप यात्रु नचढाउने गरी शुरु गन्तव्यदेखि अन्तिम गन्तव्यसम्म यातायात संचालन गर्ने र यात्रुहरुको विवरण दुरुस्त राख्ने । (झ) लामो दूरीमा चल्ने सार्वजनिक यातायातका यात्रुहरुलाई सम्भव भएसम्म एन्टिजेन परीक्षण गर्ने व्यवस्था मिलाउने ।
-
कार्यालय र पसल जस्ता सार्वजनिक स्थलमा सेनिटाइजर र मास्कको प्रयोग अनिवार्य गर्ने । कुनै व्यक्तिले मास्क नलगाई आएमा व्यवस्थापकले बढीमा ५ रुपैंया लिई मास्क उपलव्ध गराउने । मास्क नलगाउने व्यक्तिलाई कार्यालय तथा पसलमा प्रवेश नदिने ।
-
होटल तथा रेष्टुरेण्टले देहाय बमोजिमका मापदण्ड पालना गरी सेवा दिनेः-
(क) होटल तथा रेष्टुरेण्टका कामदारले अनिवार्य रुपमा मास्क, फेस-सिल्ड र पन्जा लगाउने ।
(ख) होटेल तथा रेष्टुरेण्टमा प्रवेश गर्ने सबै सेवाग्राहीलाई मास्क अनिवार्य गर्ने ।
(ग) कूल क्षमताको आधा भन्दा बढी नहुने गरी कम्तीमा दुई मिटरको भौतिक दूरी कायम गर्नु पर्ने ।
(घ) सेनिटाइजरको व्यवस्था गर्नु पर्ने ।
(ङ) होटेल तथा रेष्टुरेण्टलाई नियमित रुपमा निसङ्क्रमित गर्नु पर्ने ।
(च) होटेल तथा रेष्टुरेण्टमा कुनै सेवाग्राही मास्क नलगाई आएमा व्यवस्थापकले बढीमा ५ रुपैंया लिई मास्क उपलव्ध गराउनु पर्ने र मास्क नलगाउने व्यक्तिलाई होटेल तथा रेष्टुरेण्ट प्रवेश गर्न नदिने ।
(छ) खोपको पूर्ण मात्रा लगाएका सेवाग्राहीलाई मात्र खोप कार्डको आधारमा होटेल तथा रेष्टुरेण्ट प्रवेश गर्न दिने ।
(ज) होटेलले आफ्नो होटलमा बास बस्ने ग्राहकलाई एन्टिजेन परीक्षण गर्ने व्यवस्था मिलाउने, नतिजा आए अनुसार उपयुक्त सहयोग गर्ने र सोको अभिलेख राम्ररी राख्ने ।
- राष्ट्रिय राजमार्गहरुमा संचालित होटेल तथा रेष्टुरेण्टहरुले जनस्वास्थ्य र स्वास्थ्य सुरक्षाका मापदण्डहरु पालना गरी भिडभाड नहुने व्यवस्था मिलाई आलोपालो गरी सेवा दिने ।
- सबै प्रकारका व्यवसायहरुको अग्रपङ्तिको काउन्टरमा रही काम गर्ने र ग्राहकहरुलाई नियमित सेवा दिने कर्मचारीको सम्बन्धित निकाय वा संस्थाले हप्ताको २ पटक एन्टिजेन परीक्षण गराई रिपोर्ट नेगेटिभ आएका व्यक्तिलाई मात्र काममा खटाउने ।
- जुनसुकै सेवा वा क्षेत्रमा कार्यरत व्यक्तिमा कोभिड-१९ को चिन्ह वा लक्षण देखिएमा अनिवार्य रुपमा ५ दिन क्वारेण्टिनमा बस्ने र ५ दिन पछि कोभिड-१९ परीक्षण गरी रिपोर्ट नेगेटिभ आएमा सेवामा खटिने ।
- सार्वजनिक सेवा प्रदायकहरुले प्रमाण हेरी सेवा स्थल प्रवेश दिने व्यवस्था मिलाउने ।
-
नियमित रुपमा संचालन हुनुपर्ने स्वास्थ्य सेवाहरु जनस्वास्थ्यका मापदण्ड पालना गरी नियमित संचालन गर्ने ।
-
संस्थाको साधारण सभा वा वैठक भर्चुअल र भौतिक उपस्थितिलाईसमेत गणपूरक संख्या मान्ने र सम्बन्धित संस्थाको गणपूरक संख्या सम्बन्धमा भर्चुअल उपस्थितिलाईसमेत गणपूरक संख्यामा गणना गर्ने व्यवस्था गर्ने ।
-
कुनै पनि सार्वजनिक संस्थाको पदाधिकारी वा कर्मचारी कोभिड-१९ बाट संक्रमित भएमा उपचार पश्चात वा आइसोलेसन पश्चात कोभिड-१९ परीक्षण गरी नेगेटिभ नतिजा आएमा मात्र काममा खटिने ।
-
भौतिक रुपमा सार्वजनिक सेवा लिन खोप कार्ड आवश्यक पर्ने भएकोले सबैले खोप लगाई सोको प्रमाण आफूसँग राख्ने, सार्वजनिक सेवा प्रदायकहरुले प्रमाण हेरी सेवा स्थल प्रवेश दिने व्यवस्था मिलाउने ।
-
यस आदेशमा उल्लेख भए बाहेकका अन्य सेवा वा कार्यसँग सम्बन्धित निकाय, सार्वजनिक, निजी, गैरसरकारी संघसंस्था, कल कारखानाले त्यस्तो सेवा वा कार्य संचालन गर्दा गराउँदा जनस्वास्थ्यका मापदण्ड पालना गर्नु गराउनु पर्नेछ ।
-
व्यावसायिक, पेशागत र सामुदायिक संघ संस्थाले यो आदेशको पालना गर्ने गराउने र कोभिड-१९ रोकथाम, नियन्त्रण तथा उपचार व्यवस्थापनमा सहयोग गर्नुपर्नेछ ।
-
यस आदेशमा लेखिएकोमा यसै बमोजिम र अन्य कुराको हकमा नेपाल सरकारले अन्य आदेश वा सम्बन्धित मन्त्रालयले जारी गरेका मापदण्ड वा आदेश बमोजिम हुनेछ ।
-
यस आदेशको पालना गर्नु सबैको कर्तव्य हुनेछ । यस आदेशको अवज्ञा गर्ने वा आदेश कार्यान्वयनमा बाधा पुर्याउने व्यक्ति तथा संस्थालाई सङक्रामक रोग ऐन, २०२० बमोजिम कारबाही र सजाय हुनेछ ।
मितिः- २०७८।१०/१४
(वेदनिधि खनाल)
प्रमुख जिल्ला अधिकारी